У храналагічным парадку сабраны падзеі і факты гісторыі Случчыны са старажытнасці да нашага часу. Разлічана на краязнаўцаў, настаўнікаў гісторыі, школьнікаў і студэнтаў, а таксама ўсіх, хто цікавіцца мінуўшчынай нашага краю.

Ад аўтара
Шаноўныя сябры, мы жывём у ХХI стагоддзі. Скажыце, а каму не цікава, што адбывалася ў нашым краі трыста гадоў або пяць-шэсць стагоддзяў таму? Мяне, напрыклад, гэта вельмі зацікавіла, больш таго – «прымусіла» збіраць і занатоўваць сведчанні мінуўшчыны Случчыны. На вялікі жаль, многія яе старонкі, часта – цікавыя і значныя, не дайшлі да нас праз смугу стагоддзяў, а тыя, што захаваліся, раскіданы па шматлікіх крыніцах, сховішчах і не заўсёды могуць трапіць да шырокага кола чытачоў. Як ні крыўдна, ды гэта – факт. Але ж памятаецца і тое, што рускі гісторык Мікалай Міхайлавіч Карамзін некалі сказаў: «Кто не знает истины о своём прошлом, тот не достоин будущего... Неправда о героическом прошлом народа рождает неверие в настоящее...».
І хоць М.М.Карамзін меў на ўвазе гісторыю расійскую, яго словы не губляюць актуальнасці адносна мінуўшчыны нашага краю. Пра яе сведчаць факты і падзеі, што адбываліся на тэрыторыі Случчыны з часоў глыбокай старажытнасці да нашых дзён, найбольш значныя з якіх аўтар сабраў і выклаў у храналагічнай паслядоўнасці. У «Слуцкую мінуўшчыну» ўключаны таксама некаторыя агульнадзяржаўныя падзеі, якія аказалі істотны ўплыў на грамадска-палітычную або сацыяльна-эканамічную сітуацыю на Случчыне.
Шкада, але па аб"ектыўных прычынах не ўсе гістарычныя перыяды слуцкай гісторыі з аднолькавай паўнатой прадстаўлены ў кнізе. Так, вельмі мала захавалася дакументальна пацверджаных звестак пра тое, што адбывалася на слуцкіх землях да ХIV стагоддзя. Ёсць спадзяванні, што з цягам часу не спыняцца пошукі крыніц па гісторыі нашага краю, і мы зможам папоўніць свае веды пра найбольш раннія і найменш вывучаныя яе перыяды. Таму аўтар (E-mail: anatol.zhuk@tut.by) з удзячнасцю прыме ўсе слушныя заўвагі, прапановы, пажаданні чытачоў адносна ўдасканалення і дапаўнення «Cлуцкай мінуўшчыны», па магчымасці ўлічыць іх пры далейшай рабоце з матэрыялам.
Пры падрыхтоўцы «Cлуцкай мінуўшчыны» выкарыстаны летапісы, хронікі, архіўныя матэрыялы, дакументы органаў мясцовага кіравання і самакіравання, 16-томная «Беларуская Энцыклапедыя», энцыклапедычныя даведнікі. Шэраг звестак узяты са зборнікаў дакументаў і матэрыялаў па гісторыі Беларусі, з манаграфій вучоных-гісторыкаў, перыядычнага друку і некаторых іншых крыніц.
Вельмі разлічваю на тое, што «Слуцкую мінуўшчыну» з карысцю для сябе выкарыстаюць настаўнікі гісторыі і вучні школ, студэнты вышэйшых і навучэнцы сярэдніх спецыяльных навучальных устаноў, работнікі бібліятэк, краязнаўцы і ўсе, хто цікавіцца гісторыяй роднага краю.

Анатолій ЖУК