Бруздович Франтишек  (1861-1912)

Мастак з Піншчыны. Нарадзіўся ў вёсцы Бродніца, яна цяпер уваходзіць у склад Іванаўскага раёна Брэсцкай вобласці. Вучыўся ў Варшаве (1880 – 83), з 1883 па 1887 г. у Кракаўскай школе мастацтваў у Яна Матэйкі. Аўтар манументальных і станковых твораў. Удзельнік мастацкіх выставак, што праходзілі на Беларусі, Украіне, Польшчы, Германіі.

У 1906 г. магнатамі Вайнілавічамі, у значнай ступені на грошы якіх перад тым быў адрамантаваны драўляны касцёл святога Міхаіла ў Цімкавічах (тады мястэчка Слуцкага павета, цяпер вёска ў Капыльскім раёне), запрошаны распісаць інтэр"ер касцёла. Праца была завершана ў 1908 г. Сцены, слупы, бэлькі і іншыя часткі храма мастак пакрыў дэкаратыўным жывапісам, у якім дамінавалі раслінныя матывы з кветкамі (рамонкі, валошкі, лілеі), галінкамі яблынь, дубоў, бэзу. Мастацтвазнаўцамі яго жывапіс да гэтага часу ацэньваецца як адзін з лепшых узораў народнай традыцыі ў манументальна-дэкаратыўным мастацтве Беларусі.

Касцёл у Цімкавічах быў заснаваны слуцкім князем Янам-Сімяонам Алелькавічам напрыканцы ХVІ ст. Падканцлер ВКЛ Казімір Сапега ў 1647 г. замест гэтага, на той час ужо старога, узвёў новы касцёл, які прастаяў да рамонту 1906 г. Храм дзейнічаў да 1986 г., калі згарэў па прычынах, да гэтага часу не высветленых. Уяўленне аб роспісах Бруздовіча цяпер можна зрабіць па захаваўшыхся фотаздымках.

Пазней тыя ж Вайнілавічы запрасілі мастака аздобіць узведзены імі ў Мінску касцёл святых Сымона і Алены (Чырвона касцёл). Да 1911 г. Бруздовіч зрабіў эскізы вітражоў і роспісаў, але сам у матэрыяле задумку паспеў рэалізаваць толькі часткова.

Источник: Ціткоўскі І.А. «Мастакі Случчыны» (Слуцк. 2006)